معلومات تهمك

اهم 10 نصائح للسيدات اثناء القياده .. تجارب فعليه

نصائح همه جدا جدا للسيدات اثناء القيادة ومذكورة عن طريق تجارب شخصيه وتهم كل امراء تقبل على القيادة .

 

١ – فى مرايات الابواب ودى وظيفتها نبص فيها عشان نشوف اللى ورانا من ناحية الجنب اللى فيه المرايه ودى بنحتاجها لما نكون هننقل من حارة لحاره تانيه ف الطريق بحيث ميكونش فى حد ف الحاره هنعمل غرزه يعنى وبنحتاج بردوا لما نيجى نركن عشان نحضن العربيه.

 

٢- اشارات الاجانب ودى بنشغلها لما هناخد ملف او هنغير الحاره ودى عشان نظهر بيها للى ورانا اتجاه سيرنا يعنى مثلا حضرتك هتخشى يمين او هتاخدى ملف يمين شغلى قبليها ب ٥٠ متر كده الاشاره بتاعة الاتجاه عشان اعرف اللى ورايا انى داخل يمين فهو يهدى شويه

 

٣- بالنسبه لموضوع الركنه الموضوع مش صعب بس محتاج ممارسه يعنى مثلا انتى مبتعرفيش تركنى تعالى ع اى حته فاضيه قدام البيت وجربى تركنى او تحضنى العربيه ممكن تغلطى مره او اتنين او حتى ١٠ مرات بس كملى لحد لما تعرفى تركنى استخدمى مرايات الجنب وانتى بتركنى دا هيسهل عليكى

 

٤- صيانة عربيتك  من اهم الحاجات اللى لازم تهتمى بيها وتختارى حد ثقه يعملها لعربيتك لان عدم الاهتمام بالصيانه دا هيتسبب ان عربيتك تعطل منك وساعتها هيبقى تصرفك صعب ان تحلى المشكله دى

 

٥ – خلى دايما فى رقم للطوارئ تتصل بيه لما عربيتك تعطل وياريت تكونى حافظه الرقم دا ف دماغك مش مجرد ع الموبايل بس قد يكون اخوكى او جوزك او خطيبك او حتى الميكانيكى بتاعك نتصل بيه وقت حدوث عطل مفاجئ ف العربيه

 

٦ – الاولاد قبل سن سبع سنين ياريت تقعديهم ف الكنبه اللى ورا وبعد سن سبع سنين ممكن نقعدهم قدام ولو ابن حضرتك شقى شويه او جواه عرق ڤان ديزل ولا حاجه اربطيه ف الكنبه اللى ورا بلاش تقعديه جمبك لانه ممكن يلعب ف عصاية الغيارات او يشد الهاند بريك او حتى يبطل العربيه ويشيل المفتاح ودى كارثه لو انتى ع طريق سريع .

 

٧ -الصبح كده لما تنزلى لعربيتك ياريت تبصى ع المياه وياريت كمان بالمره تبصى ع زيت الموتور ونلف لفه حوالين العرببه نشوف الكاوتش حالته ايه وندور العربيه كده ونسبها تسخن ونخبط برجلينا ع الكاوتش عشان لو فى قطط قاعده عليه.

 

٨ – ياريت وبقول ياريت كمان مره تتعلمى ازاى تغيرى العجله بتاع العربيه عشان لو الكاوتش ريح ميبقاش ازمه بالنسبالك.

 

٩- حاولى ع قد ماتقدرى متاخريش باليل وانتى راجعه او وانتى معاكى العربيه عموما عشان متتعرضيش للمضايقه من بعض الاشكال الضاله اللى محسوبين علينا رجاله وخلاص .

 

١٠- لو عندك سفريه بلاش تسافرى باليل وخلى اى سفر بالنهار

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق