روشته علشان متتغشش وانت بتشترى عربيه مستعمله وازاي تفحص عربيتك بنفسك
ازاي تكشف على العربية – الكشف على السيارات المستعمله والاجابه على أهم الأسئلة عند شراء سيارة مستعملة ؟ انهارده هنتعلم ازاي تكشف على العربية – هذه المعلومات من احد خبراء سوق السيارات المستعملة
الموضوع ده ناس كتير طلبته منى وهو إننا إزاي نكشف على اساسيات العربية . تعالوا نعرف في شوية نقط بسيطة إزاي نعرف العربية المعيوبة من غير ما نبقي مضطرين نروح لأي حد ونغرم نفسنا علي الفاضي وتقدر تفحص أي عربية بنفسك .
هنلف لفة سريعة على صاج العربية ونخبط بظهر صوابعنا على الصاج خبط خفيف ونسمع صوت الصاج بيرن مش مكتوم (عليه معجون كتير).
اقرا ايضا : الخطوات بالتفصيل .. ازاى تستورد عربيه بنفسك وتحسب التكلفه بالكامل ؟
هنفتح الكابوت ونبص على مكان ركبة المساعد (البطاحات) لأنه أخطر مكان فى العربية لو حصل فيه خبطة مش بيرجع زى الأول وده اللى بيميز العربيات السليمة عن العربيات المعيوبة ونشوف هل فيه كسر أو شرخ أو حاجة مش مظبوطة وبالنسبة للمازدا 323 ده عيب شائع جدا وحله بسيط بتركيب خوصة تمنع فتح العلب (الشاسيه) وشرخ الركبة .
هنبص على إستوكات الكابوت واللون بتاعه مطابق للون الحوض ولا هنحس إنه جديد ونشوف الفليتو اللي هو شريط المعجون اللي بيتعمل بمكن مخصوص على أطراف الكابوت من جوة برضو مطابق وكله زي بعضه ولا لأ.
ازاي تكشف على عربيه مستعمله ؟
هنفتح الشنطة ونشيل الموكيت ونطلع الإستبن ونشوف مكانه فيه أى عيب أو اّثار لخبطات أو لحامات ولا إيه ولو لقينا أى عوازل لسة في مكانها فده مؤشر إن العربية دي فبريقة دواخل.
هنشوف غطا الشنطة والفليتو اللى بيبقى على أجناب الشنطة من جوة والقوايم وقفل وفتح الأبواب نظامهم إيه.
هناخد بس العربية على البنزينة ونرفعها ونبص عليها من تحت ولااااازم نلاقى طبقة البلاك كلها لمعة واحدة يعنى مش حتة جديدة وحتة قديمة وإلا تبقى العربيه كان فيها بارومة وأترقعت من تحت.
هنبص على أهم حاجة إن مفيش أي خبطات فى أى جزء من أجزاء العربية من تحت أو في صدر العربية او في علبة من علب الشاسيه واسلحة العلب او الشاسيه الامامية والخلفية سليمة ولا حاجة ملحومة قبل كدة.
هنعاين قوايم العربية كويس وتشوفها لو فيها خبطة او لحامات ولونها مطابق للون باقي العربية وانها سليمة.
تابع اهم النصائح لشان متتغشش وانت بتشترى عربيه مستعمله :
نرجع لورا بعيد والعربية واقفة على الارض ونشوف وقفتها مظبوطة ولا فيه جنب مقدم عن جنب وبالنسبة للارتفاع والانخفاض بيكون غالبا عيب عفشة.
بص على السقف كويس ولو فيه معجون او لحامات احتمال العربية مقلوبة قبل كده.
اكشف على البارومة في الشنطة والكبوت وتحت الدواسات.
من اخطر الاماكن في اساسيات العربية هو رقم الشاسيه لازم نتأكد انه مطابق للرخصة ومفيش اي لحامات قريبة ولا بعيدة عنه والمكان اللي موجود عليه لم يتم استبداله والا ستكون العربية مسروقة وتم التلاعب برقم الشاسيه
