معلومات تهمك

أحد خبراء ورواد سوق المستعمل يضع روشتة وأهم نصائح عند شرائك لسيارة مستعملة حسب امكانياتك

كتب ا/ فتحي الحلواني

الكثير منا عندما يقرر شراء سيارة فهناك بعض العوامل الهامه التي يقيم عليها قراره للشراء منها الاعتمادية والمبلغ المقترح والمحدد لشراء سيارة عمليه ومدى توافر قطع الغيار واستهلاك البنزين وغيرها من المحددات لاتخاذ قرار الشراء الصحيح.

الاستاذ فتحي الحلواني أحد رواد وخبراء سوق السيارات المستعملة وبخبرته يوضح لنا معلومات هامة جدا ونصائح ذات قيمة كبيرة عند اتخاذك لقرار شراء سيارة مستعملة وتكون بمثابة روشته لشراء سيارة مستعملة والميزة أنه يتحدث بالعاميه المطلقه بحيث تصل المعلومة باسهل شكل طريقة ممكنة.

ازاي تشترى عربية مستعملة وانت مطمن

كلامي ف البداية هيكون اني من واقع خبرتي في سوق المستعمل واني بكون أسبوعيا موجود في سوق السيارات المستعمله بمدينة نصر وبرصد بالفيديو حال السوق وحركه الاسعار وهبتدي انصح الناس اللى ماعندهاش خلفية كبيرة فى شراء السيارات وعاوزة تشترى

اهم النصائح عند شرائك سيارة مستعملة

هتكلم عن اول نقطة وهى تحديد نوع العربية المناسبة للمبلغ الى معايا مثلا انا معايا 50 الف جنيه وبافكر اشترى عربية اول نقطة هاشوف ال 50 الف دول يجيبوا ايه هالاقى مثلا ان المبلغ ده حايجيب لى عربية مانيوال معقولة طيب اشوف العربيات اللى ممكن اشتريهم بالمبلغ ده هالاقى على سبيل المثال وليس الحصر الاتى :


اوبل فيكترا 95 او هيونداى اكسيل 95 او اوبل كورسا 94 او سيينا 2000 او فيات تمبرا 90 او 91 او سوزوكى سويفت 93 او اسكودا فليشيا او ابيزا 94 او شاهين او جولف 89 او 90 او كيا برايد
ده على سبيل المثال لا الحصر بعد كده ابتدى ادرس كل عربية من دول هل قطع غيارها متوافرة ام لا وهل الصنايعية فى المحافظة اللى انا فيها بيفهموا فيها ولا هاتدوخنى، استهلاكها للبنزين ايه ظروفه

واجى لاخر نقطة ودى اللى باركز عليها دايما العربية دى ايه ظروفها من ناحية اعادة البيع هل هاشتريها وبعد كده احتاس فى بيعها لان فيه عربيات رغم انها ممتازة الا ان اعادة بيعها بتكون صعبة جدا.

ونيجى لتحديد احتياجى للعربية بمعنى هل انا عندى اسرة ومحتاج عربية بشنطة ولا مش مشكلة ممكن اجيب عربية هاتشباك هالاقى القايمة دى كلها انحصرت فى عربيتين او ثلاثة بالكثير.


كدة انتهينا من أهم الحاجات اللي ممكن تبني عليها قرار الشراء بتاعك” تحديد العربيات المناسبة لميزانيتنا وحصرناها بعد دراسة مزايا وعيوب كل عربية”.

بعد كده هانرتب اماكن الشراء كالتالى الاقارب ثم الاصدقاء ثم الجيران والمعارف وهكذا مالقيناش انا من راى سوق السيارات افضل من اوليكس أو اي موقع بيع وشراء علي الانترنت لان قاعدة الاختيار هاتكون اكبر اكيد واحسن من انى اروح مشوار كبير والاقى العربية مواصفاتها مختلفة عن الاعلان وده بيحصل كتير للاسف خلاص هاتوكل على الله واروح السوق ممكن اروح مرة اخذ فكرة عن الاسعار واشوف العربية المستهدفة على الطبيعة واشوفها متناسبة مع متطلباتى ولا لا خلاص استخارت ربنا اروح بنية الشراء بقى.

سوق السيارات بمدينة نصر

وفى الحالة دى ياريت يكون معايا حد موثوق فيه بيفهم مبدئيا فى العربيات لان مش كل عربية هاتعجبنى اخدها افحصها طيب ربنا كرمنى ولقيت عربية اللى معايا قاللى دى كويسة والسعر مناسب ( مبدئيا ) هاخدها على اقرب مركز فحص وعلى فكرة المراكز دى رخيصة ياجماعة ودورها فى منتهى الاهمية.

يعنى اعرف مراكز بتاخد على فحص الدواخل والبوية والشاسيه وجسم السيارة عموما ب 200 ج ولو عاوز افحص الموتور والاعطال السايقة 150 ج يعنى الاجمالى 350 ج وماتنساش تسال المهندس يتاكد ان رقم الشاسيه والموتور هما الموجودين فى الرخصة ولا لا وبعد نتيجة الفحص لو لاقدر الله العربية فيها حاجة فى الدواخل ابعد عنها تماما طبعا الكلام ده بيكون حسب عمر العربية.

لكن اى لحامات فى الشاسيه فى القوايم فى الشنطة مغيرة سقف مغيرة ربع او مغيرة نص فيها حاجة فى الحوض او القنطرة او البطاحات مفتوحة تسيبها فورا وبناءا على باقى نتائج الفحص ابتدى اعيد التفاوض مع صاحب العربية لغاية مانوصل لاتفاق فى الحالة دى هاندفع مقدم وليكن 500 ج عربون ونوقع عقد ابتدائي مثبوت فيه بيانات العربية والرقم القومى لصاحبها.

انا تشترى سيارة مستعملة

اهم الاوراق اللي مطلوب من البائع أنه يجيبها للمشترى

ونطلب منه يجيب لنا شهادة مخالفات وفحص امنى وبيانات لو الرخصة منتهية ونتقابل عند الشهر العقارى نستلم الاوراق دى وندخل نعمل عقد مسجل او توكيل ياخد باقية فلوسه ونبارك لبعض وماننساش واحنا بنفحص العربية ناخد بالنا من شكل البطارية والكماليات الموجودة لان للاسف فيه ناس بعد ماتتفق بيغير البطارية او الكاسيت او الحاجات الخايبة دى وماننساش نستلم نسخ المفاتيح ونشوف الاستبن والحاجات دى.

في النهايه قرار الشراء دة قرارك وانت تكون مرتاح للعربيه نفسيا وحاسس فعلا انها هتنفعك وتسعفك في اي مشوار أو طوارئ واستخير ربنا وخد قرارك علشان مترجعش تندم انك جبت عربية تصرف عليها مصاريف كتير وتحس انك خسرت فلوسك.

اقرأ ايضا: ازاي تكشف عن موتور وعفشه العربيه وانت بتشتريها بنفسك .. شرح مفصل لاجزاء العربيه.. ونصائح هامة

نصائح هامة جدا وانت بتشترى عربية مستعملة ازاي تشترى عربية مستعملة وانت مطمن بحيث انك تاخد قرار الشراء الصحيح من حيث الاعتمادية والمبلغ المقترح وتوافر قطع الغيار

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق